انتبه قبل يوم السبت القادم
طيب باختصار وبعد القرارات الأخيرة بفتح البلد بالكامل تقريبا يوم السبت القادم إن شاء الله لازم ناخد بالنا مش شوية حاجات لأن بكدة المسؤولية من الآخر صارت فردية..
1. المرض ما انتهاش ولا قل ولا ضعف وما أعتقدش إن فيه بيان بغير كدة كما هو واضح من الأعداد اليومية المعلنة ومش محتاج شرح
قرارات الفتح والتعايش هي امتداد للسياق العالمي وبسبب الظروف الاقتصادية وأظن ده معلوم للجميع
2. بناء على النقطة الأولى يبقى مافيش داعي لاعتبار يوم السبت الجاي "عيد نهاية الكورونا" وكدة ومافيش أي داعي للمبالغة في الانطلاق والخطط اللي بتتعمل دلوقتي للاستمتاع الكامل بالحياة والقهاوي والسينمات
3. معنى إن المسؤولية صارت فردية يعني ببساطة انت المسؤول الأول الآن عن حماية نفسك وأهل بيتك خصوصا كبار السن منهم
يعني ما تتهاونش وتفرط وتقضيها خروج وعزومات وبعدين تعيط لما حد بتحبه يصاب وما تلاقيش سرير عناية ويبقى كل همك تشتم الأطباء الوحشين اللي ماعندهمش ضمير 🤕
يعني اعقلها وتوكل على الله
4. طيب يعني إيه اعقلها؟🤔
يعني ببساطة كل اللي اتقال قبل كدة من ضوابط الوقاية لسة مكمل معانا ومستمر حتى إشعار آخر
والإشعار الآخر ده ببساطة حاجة من اتنين
الوصول لتطعيم وإنتاجه وشرائه بترتيب الدول وده غالبا مش هيكون للأسف قبل السنة الجاية على قول أكثر المختصين تفاؤلا
الوصول لحاجة اسمها مناعة القطيع يعني 70 ل 80 ٪ من الشعب يصاب وده برضه على قول أكثر المختصين تفاؤلا محتاج من 6 شهور لسنة من دلوقتي
يبقى الضوابط الوقائية لسة معانا وأهمها الآتي:
* الكمامات وضوابطها اللي قلتها لك بالتفصيل في البوست ده
* التباعد الاجتماعي من متر ونص لمترين
* الخروج للضرورة والبعد عن الأماكن المغلقة
* غسيل الأيدي وتطهيرها بانتظام 20 ثانية على الأقل
* في الجامع إن شاء الله سجادتك وكمامتك معاك دايما وتحاول تختار مسجد جيد التهوية وواسع وبلاش تكييف ومراوح
ومع كل هذا وقبله = تتوكل
تعلق قلبك بربنا
تدعوه وتتعوذ من البلاء وسائر الأسقام
أذكارك في الصباح والمساء وتضرعك زي ما هم بل تزودهم كمان
ربنا يحفظكم جميعا ويعافيكم وأهلكم وكل من تحبون
تعليقات
إرسال تعليق